მთარგმნელი: ლილი მჭედლიშვილი
ყველა ქვეყნის ისტორიაში არის გარდამტეხი პერიოდები. იაპონიის ისტორიაში ერთ-ერთი ასეთი პერიოდი VIII-XI საუკუნეებს მოიცავს. ეს ის დროა, როცა ქვეყანა ჩინეთის გავლენისგან თავისუფლდება; როცა იწყება ახალი, ჰეიანური ეპოქა. სწორედ XI საუკუნეში ცხოვრობდა იმპერატორის კარის სეფექალი, უძველესი გვარის, ფუჯივარას წარმომადგენელი მურასაკი შიკიბუ, რომლის მიერ შექმნილმა ნაწარმოებმა „ამბავი უფლისწული გენჯისა“ საუკუნეებს გაუძლო.
იაპონიის სამეფო კარის ცხოვრების დახვეწილი პორტრეტი, რომელიც XI საუკუნეში შეიქმნა, მსოფლიოში ცნობილია, როგორც პირველი რომანი. მკითხველის თვალწინ იშლება ჰეიანელი არისტოკრატიის ყოველდღიური ცხოვრების სურათები. მკაფიოდ დახატული პერსონაჟები, ეროტიკული კოლორიტი, მძაფრი გრძნობები და ქალისა და მამაკაცის ურთიერთობა არც თანამედროვე მკითხველს დატოვებს გულგრილს.
XI საუკუნეში შექმნილი ეპოპეა 54 თავისაგან შედგება. ამ წიგნში მოცემული 15 თავი წარმოდგენას შეგიქმნით იმ პერიოდის იაპონიის არამდგრადი პოლიტიკური მდგომარეობის, სახელმწიფო წყობისა და კულტურის შესახებ. დართული შენიშვნები და კომენტარები დაგეხმარებათ, იმ პერიოდის იაპონიის პოლიტიკურ და სოციალურ იერარქიასა და უძველეს ტრადიციებში გაერკვეთ.
ბესო სოლომანაშვილის რომანი „ამბავი ძველი დახვრეტილებისა და ამბავი ახალი დასახვრეტებისა“, რომელსაც ავტორი „ალუზიურ მისტიფიკაციას“ უწოდებს, მოგვითხრობს 1921 წელს საქართველოში განვითარებული მოვლენების შესახებ, როდესაც ქვეყანამ 1918 წელს მოპოვებული დამოუკიდებლობის შენარჩუნება ვერ შეძლო და ბოლშევიკებმა აქ თავიანთი ძალაუფლება დაამყარეს.
რომანის პერსონაჟები ძალაუფლების მოპოვებისთვის მებრძოლი, დაუნდობელი ადამიანები არიან. რევოლუციისა და მისი თანმხლები ძალადობის ფონზე ვითარდება უცნაური გოგოსა და ჯალათად ქცეული ბიჭის სევდიანი სიყვარულის ამბავი...
როგორ იქცევა ადამიანის ჯალათად? ვინ არის ის, მსხვერპლი თუ მოძალადე?!
ეს წიგნი ქვეყნის დამოუკიდებლობის დაკარგვისა და ადამიანის ბედის გაუკუღმართების ტრაგიკულ ისტორიას მოგვითხრობს. ბესო სოლომანაშვილი კინო- და ტელერეჟისორია. ამავე დროს, ქართველი მკითხველი მას იცნობს, როგორც მწერალს. სხვადასხვა დროს გამოცემული აქვს სამი პროზაული კრებული. „ამბავი ძველი დახვრეტილებისა და ამბავი ახალი დასახვრეტებისა“ მისი პირველი რომანია.
მთაგრმნელი:ეკა სუმბათაშვილი
წიგნი ახალგაზრდა ამერიკელი წყვილის, ფრენკისა და ეიპრილის შესახებ მოგვითხრობს, რომლებიც ორ შვილთან ერთად საცხოვრებლად „ამბოხის გზაზე“ გადადიან. ფრენკი სამსახურით უკმაყოფილოა, ხოლო ეიპრილი თავის თავს დიასახლისად არასდროს მოიაზრებდა, ის თეატრის მსახიობობაზე ოცნებობდა. ერთ დღესაც ეიპრილი ფრენკს დაარწმუნებს, რომ დროა, თავიანთ ოცნებებსა და მისწრაფებებს მისდიონ. როგორია 1950-იანი წლების ამერიკაში მცხოვრები ახალგაზრდა წყვილის გზა ოცნებებისკენ? – ამ კითხვაზე პასუხის გაცემას ცდილობს რიჩარდ იეიტსი, მე-20 საუკუნის ამერიკული ლიტერატურის დიდი ავტორი.
1961 წელს, რიჩარდ იეიტსის პირველმა რომანმა „ამბოხის გზა“ სწრაფად მოიპოვა პოპულარობა. 2008 წელს გამოვიდა რომანის მიხედვით გადაღებული ფილმი კეიტ უინსლეტისა და ლეონარდო დიკაპრიოს მონაწილეობით და მკითხველთა ახალმა თაობამ ხელახლა „აღმოაჩინა“ რიჩარდ იეტსი, რომელსაც ამერიკულმა პრესამ სასოწარკვეთილების ეპოქის მწერალი უწოდა. ის ყოველთვის თავისი ნაწარმოებების პერსონაჟი ქალების გვერდითაა – იმ ქალებისა, რომელთაც იმედი გაუცრუვდათ მამაკაცების ამბიციურობის ან სიმხდალის გამო.
მთარგმნელი: რუსუდან ღვინეფაძე
XX საუკუნის გენიალური მწერალი ფრანც კაფკა, რომელმაც უდიდესი გავლენა მოახდინა მსოფლიო ლიტერატურაზე, დაიბადა 1883 წელს პრაღაში, ებრაელი ვაჭრის ოჯახში. გიმნაზიის დამთავრებისთანავე სწავლა განაგრძო პრაღის უნივერსიტეტში და ლიტერატურითაც სტუდენტობისას დაინტერესდა. აქვე დაუახლოვდა კაფკა მაქს ბროდს, რომელმაც შემდგომ მისი ნაწარმოებების ბედი შეცვალა. მწერალს არცერთი რომანი არ დაუსრულებია და საკუთარი ნაშრომების უმეტესობა დაწვა. სიცოცხლეში მისი ტალანტი არავის უღიარებია. რამდენჯერმე გამოაქვეყნა მოთხრობები (მათ შორის, რომან „ამერიკის“ პირველი თავი), თუმცა წარუმატებლად. მწერალი 1924 წელს ტუბერკულოზმა შეიწირა. მაქს ბროდმა არ შეუსრულა მეგობარს უკანასკნელი სურვილი, გაენადგურებინა მისი თხზულებები და გამოაქვეყნა ისინი. ასე გაიცნო მსოფლიომ
ერთ-ერთი უდიდესი გერმანულენოვანი მწერალი – ფრანც კაფკა.
„პროცესის“, „კოშკისა“ და სხვა უდიდესი ნაწარმოებების ავტორის ნოვატორული სტილი პირველად გამოიკვეთა მის დაუმთავრებელ რომანში „ამერიკა“, რომელშიც აღწერილია 16 წლის ემიგრანტის, კარლ როსმანის მოგზაურობა და ცხოვრება მრავალთა საოცნებო ქვეყანაში. მშრალი, თითქოსდა დოკუმენტური თხრობის მიუხედავად, რომანში გენიალურადაა გადმოცემული პერსონაჟის ცნობიერების სიღრმეები. თავად მწერალი არსად ჩანს, კომენტარებისგან თავს იკავებს, უბრალოდ, დაწვრილებით აღწერს სიტუაციას და დასკვნების გამოტანას მკითხველს მიანდობს. სწორედ ეს, კაფკასთვის დამახასიათებელი მშრალი და, ამავე დროს, დაძაბული თხრობა წარუშლელ შთაბეჭდილებას ტოვებს. აღსანიშნავია, რომ მწერალი ამერიკულ შთაბეჭდილებებს ისე აღწერს, რომ მას ამ ქვეყნის მიწაზე ფეხიც არ დაუდგამს.
მთარგმნელი: ალექსი სიუკაევი
ამერიკელი მწერლის, ბრეტ ისტონ ელისის „ამერიკელი ფსიქოპათი“ ტრანსგრესიული რომანის ნიმუში და თანამედროვე ამერიკული ლიტერატურის ერთ-ერთი თვალსაჩინო წარმომადგენელია. ნაწარმოებმა ჯერ კიდევ გამოცემამდე გამოიწვია აჟიოტაჟი, როცა გამომცემლობა Simon & Schuster -მა, მიუხედავად იმისა, რომ ავტორს სერიულ მკვლელზე რომანის დაწერა თავად შეუკვეთა, „ამერიკელი ფსიქოპათის“ გამოცემაზე უარი თქვა, რადგან ქალთმოძულეობის გამავრცელებლად და, ამდენად, სახიფათოდ მიიჩნია. 1991 წელს რომანი გამომცემლობა Vintage -მ გამოსცა, 2000 წელს კი, მერი ჰარონის ამავე სახელწოდების ეკრანიზაციის გამოსვლის შემდეგ, „ამერიკელი ფსიქოპათი“ მთელმა მსოფლიომ გაიცნო.
ბრეტ ისტონ ელისის ნაწარმოებებში მოქმედება ძირითადად 1980-იანი წლების ამერიკაში ხდება, მთავარი თემა კი მომხმარებლური კულტურა და გართობის ინდუსტრიაა, როგორც ამ პერიოდის აშშ-ის მთავარი სიმბოლო. სწორედ აღნიშნულ დროით და სივრცით გარემოში ვითარდება „ამერიკელი ფსიქოპათის“ სიუჟეტიც. რომანმა, რომლის მთავარი გმირი – პატრიკ ბეიტმენი – დღისით მსხვილი კომპანიის ხელმძღვანელის მდიდრული ცხოვრებით ცხოვრობს, ხოლო ღამით სასტიკ მკვლელად გარდაიქმნება, გამოსვლისთანავე მიიპყრო მკითხველთა და კრიტიკოსთა ყურადღება.
„პატრიკ ბეიტმენის ქმედებები და, მით უმეტეს, მისი რეაქციები იმის სიმბოლოს წარმოადგენს, თუ რაოდენ გულგრილი და უგრძნობი გახდა ჩვენი კულტურა ძალადობის მიმართ...“ – აღნიშნა ერთხელ თავად ავტორმა.
მთარგმნელი: ნიკა სამუშია
ამერიკა ორ ნაწილადაა გაყოფილი. ერთ მხარეს სხვადასხვა ერის მითიური არსებები და ღმერთები დგანან, მეორე მხარეს კი მედიის, ტექნოლოგიის, ნარკოტიკების ღმერთები არიან. წიგნის – „ამერიკელი ღმერთები – ავტორი ნილ გეიმანი გვარწმუნებს, რომ ღმერთები არსებობენ იმიტომ, რომ ხალხს მათი არსებობის სჯერა, ისინი ჩვენი რწმენით იკვებებიან. თანამედროვე ადამიანს კი ტექნოლოგიის უფრო სჯერა, ვიდრე ოდინის ან ანუბისის არსებობის. სისხლიან ბრძოლაში ძველი ღმერთები ახალ ძლევამოსილ მოწინააღმდეგესთან ნელ-ნელა მარცხდებიან.
ამერიკული ზღაპრები იმ შორეული ქვეყნის შესახებ მოგვითხრობს, სადაც დათო ტურაშვილმა ასი დღე გაატარა საერთაშორისო ლიტერატურული პროგრამით.
მიუხედავად იმისა, რომ წიგნი ერთი შეხედვით დოკუმენტურ მასალაზეა აგებული, მასში ძნელი გასარჩევია, სად მთავრდება რეალობა და იწყება გამონაგონი, ამიტომ ამერიკული ზღაპრები ერთდროულად მცირე რომანიცაა და ზღაპარივით მოყოლილი ისტორიაც, რადგან, ავტორის თქმით, ამერიკაში ზღაპარსა და რეალობას შორის ზღვარი თითქმის არ არსებობს.
დავით წერედიანის ანარეკლი პირველად 2005 წელს გამოიცა და სახელმწიფო პრემია დაიმსახურა. წინამდებარე გამოცემა შევსებულია და რამდენადმე სახეცვლილია.
მისი ძირითადი ნაწილი ქართულ კლასიკურ პოეზიას ეძღვნება, რუსთაველიდან გალაკტიონამდე; მრავალი რამ ახლებურად არის დანახული და წაკითხული. სწორედ ამ ძირითადმა მონაკვეთმა განაპირობა, რომ წიგნი შეტანილია ეროვნული გამოცდების ცენტრის მიერ შედგენილ და პედაგოგთათვის განკუთვნილ სარეკომენდაციო ლიტერატურის სიაში. მაგრამ, იმედია, იგი იპოვის სხვა მკითხველსაც, რომელსაც სისხლხორცეულად აინტერესებს ქართული, და არა მხოლოდ ქართული, პოეტური კლასიკა.
ბოლო მონაკვეთი უმთავრესად დასავლურ პოეზიას ეძღვნება. დამატების სახით ერთვის წიგნის ავტორის მიერვე შესრულებული რამდენიმე რჩეული თარგმანი.
ახალგაზრდა წარმატებული მწერალი ანა ნაკაშიძე მოულოდნელად მეხსიერებას კარგავს. გამოკვლევები ადასტურებს, რომ მის ამნეზიას ფიზიოლოგიური საფუძველი არ გააჩნია. მისი ქმარი, ასევე, პოლიციელი და ფსიქოთერაპევტი ეჭვობენ, რომ ის ავად არ არის. ეს უცნაური ამბავი თანდათან მასშტაბებს იძენს, ქვეყნის ფარგლებს სცდება და იქცევა დიდი არეულობის დასაწყისად, რომელიც მანამდე გასტანს, სანამ მთელი მსოფლიო სიმართლის გარკვევის მოთხოვნით არ გაერთიანდება. მცირე რომანი „ანას მომენტი“, ერთი მხრივ, მესამე სამყაროს ხმაა, რომელიც თანამედროვე მაღალგანვითარებული ქვეყნების ყურს არ სწვდება და მას გულგრილად უვლიან გვერდს, მეორე მხრივ კი პასუხია იმაზე, რა შეიძლება გახდეს ძალადობისა და ტერორიზმის საფუძველი.
მარი ბექაური ახალგაზრდა ავტორია, რომლის რომანებსაც მკითხველი უკვე იცნობს. მისი მოთხრობები შვიდჯერ შევიდა ყოველწლიურ კრებულში „წლის 15 საუკეთესო მოთხრობა“. ავტორს რამდენიმე სხვადასხვა ლიტერატურული ჯილდო და პრემია აქვს მიღებული. ოთხი მოთხრობა ექვს ენაზეა თარგმნილი, 2015 წელს კი მწერალი მონაწილეობდა საერთაშორისო ლიტერატურულ პროექტში „The Novel of the World“.
მთარგმნელი:გია ბერაძე
ამერიკელი მწერლისა და ჟურნალისტის, „და ვინჩის კოდის“, „ინფერნოს“, „დაკარგული სიმბოლოს“ ავტორის , დენ ბრაუნის მისტერია - „ანგელოზები და დემონები“ მისი ერთ-ერთი ბესტსელერია, რომელიც უამრავ ენაზეა თარგმნილი და მრავალ მილიონ ეგზემპლარადაა გაყიდული.
წიგნი მოგვითხრობს ილუმინატების საიდუმლო ორდენზე, რომელიც შუა საუკუნეებში სამკვდრო-სასიცოცხლოდ დაუპირისპირდა ოფიციალურ ეკლესიას. ნუთუ ეს ყველაფერი მხოლოდ ლეგენდაა უძველესი წარსულიდან? მაშინ ბნელით მოცულ გარემოებაში ცერნში მოკლული მეცნიერის მკერდზე რატომ არის ამოტვიფრული ილუმინატების სიმბოლო? რა კავშირი აქვს ყოველივე ამას რომის პაპის გარდაცვალებასთან და კონკლავის დღეს გატაცებულ ოთხ კარდინალთან?
ჰარვარდიდან რომში მიწვეული სიმბოლოების უდიდესი ექსპერტი, პროფესორი ლენგდონი და მისი მეწყვილე, გარდაცვლილი მეცნიერის ქალიშვილი ვიტორია ვეტრა გამოძიებას იწყებენ. ისინი „ილუმინატების“ სახელით ცნობილი საიდუმლო საძმოს ფერფლიდან აღდგენის მტკიცებულებას აღმოაჩენენ: ილუმინატებმა მოიპარეს საშიში იარაღით აღჭურვილი კონტეინერი და მზად არიან, ომი გამოუცხადონ დაუძინებელ მტერს - კათოლიკურ ეკლესიას.
ამ წიგნში დაუჯერებელი ამბები ხდება...
მთარგმნელი: მიხეილ ანთაძე
ცნობილი ჟურნალისტის, ოლეგ პანფილოვის სტატიების კრებული „ანტისაბჭოთა ისტორიები“ რუსული იმპერიალიზმის ერთ-ერთ უსაშინლეს იარაღს – ტყუილზე დამყარებულ იდეოლოგიურ პროპაგანდას – ეძღვნება. ავტორის განმარტებით, ამ წიგნის მთავარი თემა სიცრუეა, რომელსაც კრემლი სამი ძირითადი ისტორიული ეტაპის – რომანოვების იმპერიის, საბჭოთა ხელისუფლების და თანამედროვე, პუტინის პერიოდის – განმავლობაში პერმანენტულად და ეფექტურად იყენებს თავისი „ველიკოდერჟავნიკული“ მიზნების განსახორციელებლად, მოსახლეობის დასამონებლად, მეზობელი ქვეყნების დასაპყრობად და მსოფლიოში საკუთარი გავლენის გასაძლიერებლად. კრებული უკვე არაერთ ენაზე ითარგმნა და გამოიცა. ამჯერად ამ უაღრესად საინტერესო და ამაღელვებელ „ანტისაბჭოთა ისტორიებს“ ქართველი მკითხველი მშობლიურ ენაზე გაეცნობა.
ეს ყოვლად უცნაური წიგნი უამრავი
მოულოდნელობითაა აღსავსე და
ახალგაზრდების შემოქმედებით უნარებს
ფართო გასაქანს აძლევს. წიგნის
ინსტრუქციებს თუ მიჰყვება, არავინ
მოიწყენს, მიუხედავად მისი ასაკისა.
წიგნის შექმნის კონცეფცია და მიზანი ასე
ჟღერს: ხშირად, შესაძლოა, თავი საკმაოდ
უცნაურ სიტუაციებში ამოყოთ, მაგრამ
ნებისმიერ შემთხვევაში გახსოვდეთ,
რომ არ დაინდოთ ეს დღიური. შედეგად
თავს უკეთ იგრძნობთ და განადგურების
ნაცვლად შეიძლება ხელოვნების ნიმუში
შეგრჩეთ ხელში.
ასაკი: 6+
აქტივობები :
ამ წიგნში თავმოყრილი თავსატეხები, კროსვორდები, გემრიელი კერძების რეცეპტები, სახატავი დავალებები, ჯგუფური თამაშების უამრავი იდეა და ნაირნაირი სხვა გასართობი თქვენს არდადეგებს კიდევ უფრო მხიარულს გახდის და მოწყენის საშუალებას არ მოგცემთ მგზავრობისას, კურორტზე, ან თუნდაც შინ.
5,10 და 15 წუთში წასაკითხი წიგნების სერია. სასაცილო ისტორიები დამწყები მკითხველებისთვის და ყველა ზღაპრის ბოლოს ბევრი ფურცელი ზღაპრის გმირებთან ერთად სათამაშოდ.
